ЯҢАЛЫКЛАР

Бүген ТР Президенты вазифаларын вакытлыча башкаручы Рөстәм Миңнеханов "Учительская газета"ның баш мөхәррире Петр Положевцев белән очрашты. Очрашу ТР Хөкүмәте йортында узды. Әңгәмәнең төп темасы агымдагы елның октябрь аенда Нурлатта "Ел укытучысы-2015" Бөтенроссия конкурсын үткәрү булды. Очрашуда шулай ук ТР Премьер-министры урынбасары - мәгариф һәм фән министры Энгель Фәттахов, ТР Президенты ярдәмчесе Ләйлә Фазлыева катнашты.  

Бүген Казанның 178нче Мәгариф үзәге базасында “Ел укытучысы-2015” республика конкурсының финал өлеше старт алды. Һөнәри осталык бәйгесенең йомгаклау сынаулары 13-17 апрель көннәрендә Татарстан башкаласында уздырыла. Аларда зона этапларында җиңгән 45 укытучы көч сынаша.

Татарстан Республикасы җыелма командасы Самарада 9-12 апрель көннәрендә уздырылган “WorldSkills Russia 2015" Идел буе федераль округы чемпионаты ярымфиналында җиңүгә лаек булды. Анда Идел буе федераль округының 13 төбәге катнашты. Ярышлар 11 һөнәр буенча үткәрелде.

10 апрель көнне Казанның “Пирамида” мәдәни-күңел ачу комплексында көллият һәм техникум студентларының “Без – бәхетле буын” үзешчән сәнгать фестивале җиңүчеләрен бүләкләү тантанасы була. Әлеге фестиваль, Бөек Ватан сугышында Җиңүнең 70 еллыгына багышлана һәм яшь буында ватанпәрвәрлек хисләре тәрбияләү, аның социаль активлыгын, яшьләр үзешчән коллективларының иҗатта мөмкинлекләрен үстерү, тарихи хәтер һәм милли-мәдәни традицияләрне саклау һ.б. максатлардан, үткәрелә.

10нчы апрель көнне Татарстан Республикасы мәгариф һәм фән министрлыгында «Татарстан Республикасында милли мәгариф һәм аның үсеш перспективалары» темасына багышланган киңәшмә узды. Киңәшмә ТР Премьер-министры урынбасары – мәгариф һәм фән министры Э.Н. Фәттахов җитәкчелегендә үткәрелде.

2015 елның 2-8 апрелендә Новосибирск шәһәрендә  химия фәне буенча Бөтенроссия мәктәп укучылары олимпиадасының йомгаклау этабы узды. Олимпиадада химия фәнен иң яхшы белүче 250 мәктәп укучысы - Россиянең төрле өлкәләреннән килгән региональ этап җиңүчеләре катнашты. Татарстан укучысы Руслан Котляров - Казан шәһәренең 131нче лицее укучысы унынчы сыйныф укучылары арасында абсолют җиңү дип табылды

Бүген Россия укучылары физика һәм чит ил телләре (язмача өлеше) буенча БДИны тиешле вакытыннан алда тапшыра. Татарстанда физика буенча бу төр имтиханны 44, инглиз теле буенча 18, испан теле буенча 1 кеше тапшырырга гариза биргән булган. Сынаулар Казанның Идел буе районындагы 6нчы гимназиясендә 10.00дә башланды.

11 апрель көнне Казанның  Идел буе спорт һәм туризм академиясендә физкультура буенча Бөтенроссия укучылар олимпиадасы йомгаклау этабының ачылу тантанасы була. Чарада Татарстан Республикасы Премьер-министры  урынбасары - мәгариф һәм фән министры Энгель Фәттахов һәм РФ Дәүләт Думасы депутаты, Дәүләт Думасы комитетының физик культура, спорт һәм  яшьләр эшләре буенча урынбасары Марат Бариев катнаша.  Бөтенроссия олимпиадасында катнашу өчен Татарстан башкаласына  Россиянең 62 төбәгеннән 300гә якын өлкән сыйныф укучысы җыелды.

Татарстанда 2015 елның 18 мартында башланып киткән республикакүләм «IT-чемпион» бәйгесе дәвам итә. Бүгенге көнгә бәйгедә республикабызның 882  мәктәбеннән 16 меңнән артык укучы катнаша. Аларның логиннары uslugi.tatarstan.ru Татарстан Республикасы дәүләт һәм муниципаль хезмәтләр порталындагы 20 138 шәхси кабинетта сакланган.

10 апрельдә Яшел Үзән шәһәренең 3нче гимназиясе базасында Х Бөтенроссия Занков укуларының республика этабы узды. Чарада Казан федераль университеты мөгалимнәре, Казан, Яшел Үзән, Бөгелмә, Чистай, Югары Ослан һәм Лаеш районнарыннан  мәктәп директорларының тәрбия эшләре буенча урынбасарлары, укытучылар һәм тәрбиячеләр катнашты.