ЯҢАЛЫКЛАР

Быелгы уку елында РФ Мәгариф һәм фән министрлыгы вәкилләре Бердәм дәүләт имтиханын тапшыруда яңалыклар булмый дип ышандырса да, шушы көннәрдә интернетта моның киресен дәлилләгән хәбәр таратылды.

РФ Хөкүмәтенең 2012 елның 28 мартында дөнья күргән карары буенча быел абитуриентлар өчен бюджет урыннары 490 775 дип билгеләнгән. Моның эченә бакалаврлар өчен каралган - 360 473, магистрлар өчен - 62 053, белгечләр өчен 68 249 урын кертелгән. 2012 елда бюджет урыннары саны үзгәрмәгән, шушы саннар эчендә техник һәм инженерлык белгечлекләрен әзерләп чыгаруга һәм бакалавриатка урыннар күбрәк бирелгән.

“2012 елда Россиядә яшүсмерләр сигезлеге” бәйгесенең республика этабы тәмамланды. Анда Татарстанның 20 район һәм шәһәрләреннән 74 югары сыйныф укучысы катнашты. Сигезе икенче этапка чыкты.

5-6 апрельда Бөгелмә каласында “Яшел ут”/”Зеленый огонек” республика смотр-конкурсы финалы була. Мәктәпкәчә белем бирү учреждениеләре һәм тәрбиячеләр арасында балаларның юлда транспорт һәлакәтләренә юлыгуын профилактикалау буенча уздырыла торган әлеге конкурс сабыйларны юлларда куркынычсызлык кагыйдәләрен төгәл үтәп йөри белергә өйрәтүне җанландыруны максат итә.

Рейтинг нәтиҗәләре буенча Татарстан педагоглары әйдәп баручы дип табылды. Тамбов, Ярослау, Әстерхан өлкәләре, Чуашстан да алдынгылар рәтендә.

Әлмәттә мәктәпләргә капиталь ремонт уздыру программасы старт алды. Мәгълүм булганча, программага 3 мәктәп: 2 һәм 7 нче, Урман Кәләе мәктәпләре кертелде, дип хәбәр итә “Әлмәт таңнары” газетасы.

Татарстан мәктәпләрен капиталь ремонтлау буенча өч елга исәпләнгән республика программасының быелгы планына Тукай муниципаль районының Бәтке һәм Яңа поселогы мәктәпләре кертелгән иде. Язгы каникул чорында аларда төзекләндерү эшләре башланды, дип хәбәр итә “Якты Юл” газетасы.

Болгар шәһәренең 1нче урта мәктәбе коллективы язгы каникулларны соңрак вакытка күчерү турында карар кабул итте. Бу карар авыл мәктәпләрендәге кебек һава торышына карап түгел, ә булачак капиталь ремонтка бәйле, дип хәбәр итә “Яңа тормыш” газетасы.

Федераль дәрәҗәдә “Сәләтле балалар” концепциясен эшләү дәвам итә. Ул көчле мәктәпләр, уңышка ирешкән укытучылар һәм талантлы балалар өчен өстәмә финанслар бүлеп бирүне күз алдында тота.